monumenta.ch > Hieronymus Incertus > Hieronymus Incertus, Epistolae, p27, I.
>>> Hieronymus Incertus, Epistolae, EPISTOLA XXVII, SEU SERMO DE QUADRAGESIMA., II.

I.

1  Quomodo miles semper exercetur ad praelium, et simulatis ictibus, veris postea vulneribus praeparatur: ita omnis quidem Christianorum vita indiget abstinentia: sed maxime quando hostis prope est, et praeparatum adversum nos exercitum ducit inimicus. 2  Omni servis Dei tempore ieiunandum est: sed tunc amplius cum ad immolationem agni, ad mysterium baptismatis, ad Christi carnem et sanguinem praeparamur. 3  Statim enim ut oves suas recedere velle de proprio grege viderit diabolus, fremit, irascitur, furit, et foris adversus eas viribus commovetur, perire sibi existimans quidquid Christo salvatur: et mori synagogae suae, quidquid Ecclesiae vivificatur.